En in uaul profund e selvadi dalla dschungla viva in giuven cameleon cul num Camillo. Il pli bugen stat Camillo a sulegl sin siu rom preferiu e siemia da loghens jasters e nunenconuschents … (entschatta dil cudisch «Camillo»)
La Surselva Romontscha realisescha uonn ensemen cun Riccarda Camenisch e Manfred Zazzi il cudisch «Camillo – il cameleon el mund magic dallas canzuns», in cudisch cun canzuns per affons. Empremas impressiuns dallas differentas lavurs pudein nus gia presentar.
Dar ina fatscha a Camillo e ses cumpogns
Riccarda Camenisch, l’autura dil text e dallas canzuns da «Camillo», gliema actualmein vid la versiun finala e creescha las illustraziuns che duein accumpignar il cameleon Camillo sin siu viadi tras il mund magic dallas canzuns …
Impressiun ord il studio
Ferton accumpogna Riccarda Camenisch era la producziun dils audios tier sias canzuns. Quels producescha Manfred Zazzi (Aquarium Stuidos GmbH) cun cantaduras e cantadurs romontschs sco per exempel Dario Hess, Chiara Jacomet e Gino Carigiet.
Gliesta dallas canzuns (tetels provisoris)
- 1. Jeu sun glisch
- 2. Amitgs sco nus
- 3. Mics, miur grischa nua lein ir?
- 4. Heyaho pirats
- 5. Joshua ed il pèsch dad aur
- 6. La princessa dalla mar
- 7. Las strias dil cuolm blau
- 8. Stria Elly
- 9. Drags, quels han da nuot sterment
- 10. Sin viadi tras igl univers
- 11. Jeu a ti e ti a mi
- 12. Vus glischs splendurei
- 13. Audas il messadi da Nadal
- 14. Fiasta dalla dschungla
In schatg ord il cudisch: Heyaho pirats (text provisori)
La pintga puntera segeina envi ed enneu sillas undas. «Hui, co quei balluca si cheu!», cloma Camillo riend e setegn ferm vid la liunga petga dalla vela.
«Mira!», cloma Mics tuttenina e muossa cun sia toppa grischa viers la mar. «Vesas quella barca?»
Camillo pren il perspectiv ed observa in tec pli exact. Ina barca imposanta cun velas neras s’avischina cun grond tempo. «Oje, pirats! Tgisà sche quels ein prigulus?», damonda el in tec malsegirs.
Ferton ei la barca gia fetg datier da lur puntera, ed in papagagl cun ina clappa dad egls craschla tut dad ault giud ina petga: «Ahoi navigadurs! Essas vus preparai per s’entupar cun vers pirats sco nus? Nus essan curaschus, selvadis e cantein aunc bia pli dad ault ch’in stemprau!»
«Mo nus essan negins pirats», rispunda Camillo tut schenaus.
«Quei fa nuot», ri il papagagl. «Forsa che vus essas in tec pirats en vies cor? Vegni, revi sin nossa barca, lu anfleis vus ora ei.»
Camillo e la miur miran in sin l’auter e dattan lu omisdus il tgau. «Gie, lein ir a cantar e mirar co igl ei dad esser pirat!», cloma Camillo plein marveglias, ferton che las notas da musica sin sia pial semidan en in tgietschen-aur glischont che semeglia la colur d’in scazi prezius.
Canzun: Heyaho pirats
1. Sur la mar selvadia nus navighein,
tras las undas gigantas nus sedustein,
nossa barca ei ferma sc’in grep el stemprau
e negin orcan ha nus dumignau.
2. Nus drizzein nossa vela enviers il vent,
vein da squagls e balenas negin sterment,
calimars e medusas fugi orda peis,
nos canuns quels settan sin: «In, dus, treis!»
Refrain
Heyaho pirats, heyaho pirats,
lein menar nossa barca el liug emblidau,
heyaho pirats, heyaho pirats,
tier quei scazi prezius che negin ha anflau.
3. Essan vers pirats e pirats restein,
il camond da nies grond capitani suandein
cumbattin culla spada, stuein reiver, pescar,
mintgaton far giu truffels e schubergiar.
4. Navighein cullas steilas el firmament,
ellas muossan la vi’a nies bastiment,
culla carta dil cor suandein nies destin,
il ver scazi glischont ei en finadin!
Refrain
Impressum – «Camillo»
- Tetel: Camillo, il cameleon el mund magic dallas canzuns
- Autura, cumpositura ed illustratura: Riccarda Camenisch, Laax
- Registraziuns: Aquarium Studios GmbH, Manfred Zazzi
- Ediziun: Surselva Romontsch, 2025 (atun, entschatta unviern), 500 exemplars
- Stampa: selvacaro, Flem
- Paginas: ca. 55
- Prezi: 25 francs (inclusiv audios gratuits)